KRISMAS/CHRISTMAS
(Thinlung a lamah hawn ila, ro thil dang a ngai tawh lovang)
Khawvela hunpui kan lawm thinah hian a lar ber leh hmingthang ber eng nge, ti ta ila, a chhanna chu Krismas/Christmas kan tih theuh a rinawm. Christian-te leh sakhaw dang betute tan pawh he hun hi a boruak in a zir vang nge ni, hlim tak leh nuam ti takin kan hmang theuhin a hriat a. Chutih rual chuan kan ramah ngei pawh hian he hun kan lawm danah leh kan programme thenkhat hman dan han en hi chuan ringlotute nena kan lawm dan hi a danglamna a tam ta lo hle mai. He hunpui hi eng vanga hmang nge kan nih, eng nge kan hman chhan, tihte hi ngun takin chhut ta ila kan hman duh dan leh hman kan tum dan pawh a inthlak thei deuhin a rinawm.
Kan sualte tlan tura lei leh van Lal ber fapa Isua Krista he khawvela a lo piancham phaphak a lo thlen vanga Krismas hi hmang thin kan ni a. Chuvang, chuan he hun hi keini ringtute hian eng tianga hmang tur nge kan nih, kan sual tlantu Isua Krista hian eng tianga hmang turin nge min duh tihte hi ngun taka kan ngaihtuah fo thin a ngai a ni. Ni e, thil thar neihte, ei leh in tuihnai ber ber te, chhungkaw inhmuhkhawmna hun atana hman te hi a nuamin a hunlai tak pawh a ni. Chutih rual erawh chuan a pawimawh ber kan bosal ang tih erawh a hlauhawm hle a ni.
Bible a kan hmuh angin Isua lo pian dawn khan mi hrang hrang hnenah hriattirna a thleng a, chutih rual chuan chibai an buk dan leh an buk tum dan erawh a inang lo hlawm hle mai. Khawchhak mifingte chuan arsi danglam bik an hmuh atangin he khawvel chhandamtu tur lo pian thu an hria a. Chu arsi chu zui ve zel mahse Lal thar lo piang chu hmun ropui taka piang tur nia an ngaih avangin arsi penbo sanin Lal Heroda inah an lut a. Chu an thil tihsual chuan Judai ramah tahna rapthlak tak a thlentir phah ta hial a ni. Christmas kan lawm tum danah hian, Kohhran-in programme a siam kalsan zawngin hman kan tum em, tihte inngaihtuah ila. Chu kan tum dan chuan keimahniah hlimna min thlen ang nge, lungngaihna leh inchhirna min thlen dawn tihte ngun takin ngaihtuah ang u.
Lal Heroda khan nausen pian thu a lo hriat khan chibai bukna rapthlak tak pek a tum anih kha. Ka hriat reng thin thil pakhat a awm a. Vawi khat chu kan thianpa pakhat hian, “Christmas a hnai leh tawh sia, kan in stock teuh teh ang,” tiin zu leh ruihtheihthil chi hrang hrang Christmas leh kumthar vuakvet chhung daih tur nia a ngaih a chhek khawl teuh mai a. Vanduaithlak takin chu ka thianpa chu hunpui pawh a lo thlen hmain natna khirh tak tawkin rei pawh enkawl hman lohin a boral ta mai a. A pawi ka ti takzet a ni. Kan sualte tlan tura Lal lo pian champha a duh loh zawng tih tum nana ruahmanna kan lo siam vak thinte hi a pawiin Pathian pawi kan sawi thei tihte hi hre tel ta bawk ila.
Berampute hnenah vana vantirhkohte inlar nausen pian thu an rawn hrilh a. Berampute hi khawvel ngaih chuan mi tlawm tak angin lang mahse, van zaipawlte nen meuh an hnena inlarna lo thleng bika khan ngaihtuaha ti thuiin a mak hle a ni. Tichuan, an beram venlaite pawh ngaihsak thei tawh lovin nausen chibai buk turin hlim takin an chhuak ta tih kan hmu bawk a. He hunpui lo thleng turah hian min tlantu hian amah chibai bukna atana a duh ber chu kan thinlung hi a ni. Kan thinlung hi kan thil neiha hlu ber a ni a, chu chu Ama tana kan hlan hi a fapa Isua Krista a ro hlu tak min petu hian a phut let ve tlat a ni. Hlim hlawp zawng emaw, zu leh nulat tlangvalna te nen emaw leh khawvel thildangte nena hmang kawp lovin, kan thinlung Ama hnena hlan tlat chungin hmang ila Krismas/Christmas hlimawm tak kan hmang thei ang.