HNUNG ZUITU NUN
Tin, Isuan a zirtîrte hnênah, “Tu pawhin mi zui a duh chuan, mahni hrehawm pawisa lovin, a kraws puin mi zui rawh se. Tu pawh a nun humhim duh apiangin a chân ang a; tu pawh keimah avânga a nun chân apiangin a humhim ang. Mathaia 16:24-25
‘Kraws’ hrilhfiah dan chi hrang hrang a awm a. Taksa chak lohna te, rilru natna leh hrehawmnate hi Lalpan ‘Kraws pu’ a tih hi niin a lang lo. Duhthlanna ngeia kawng kan zawh tur niin a lang zawk. Pathian fapa Kraws chuan, khawvelin an hmuhsitna te, tihduhdahnate, zahnate a phur a. Hemi kawng thlangtute chuan khawvel hawisan kawng an thlang a ni. Ringtute hi khawvel thian, khawvel ngainatnaa an tlan chuan kraws kawng an hawisan a ni.
Mahni inngaihtuah chang lovin, ‘mahni kraws puin’ tih a hrilhfiahna kan duh chuan. ‘Lalpa nun dan kha engang nge?’ tih hi a chhanna a ni. ‘Pathian duhzawng pawm thlapna a ni e’ kan ti thei bawk ang. ‘Mahni hmasial lova midang tana nun’ tiin a hrilhfiah theih bawk ang. Dik lo taka puhna pawh dawhtheihna te, tlawmna nun te, zahngaihna te, inhlanna te a ni. Krista anga nun kawng a ni a, hotupa nun dana nun sawina a ni ber mai.
Tisa thlirna atang chuan Isua hnung zui hi kawng hrehawm, kawngralti, hlimna reng reng awm lo nun angin a lang fo. Mahse, kawng muanawm leh nuam, thlamuanna sawi hleih theih loh kawng a ni tlat si.
Ka kawng hlingin lo khat mahse,
Van thatnain min chhawk ang;
Thlamuantu Isua nena kal hi,
Kawng nuam ber a ni si.