LALPA KAN LAWM E, PATHIAN LEHKHABU THIANGHLIM MIN PEK AVANGIN
(MIZO BIBLE SERKAWNA A THLEN NI)
Rev. Dr. C.L. Hminga
Vawiin hi Serkawn tan chuan ni chhinchhiah tlak tak a ni tlat mai. Kum 60 kal ta vawiin angah hian Mizo Bible chu Serkawnah rawn phurh thlen a ni.
Chanchin tha min rawn hrilhtu hmasa ber Sap upa leh Pu Buangate anmahni tirtu Arthington-a chuan a zau thei ang bera Chanchin Tha puang turin, hmun pakhata thla thum aia rei awm lova hmun dang a insawn zêl turin a tir a. Mahse, remruatna dang an nei ta a. Mizote min hmangaih a, keimahni tawng ngeia Pathian Thu kan chhiar theih nân hma an la ta a.
Mizo tawng an zir a, ziak leh chhiar theihin min siamsak phawt a; kan chhiar thiam nân zirna Sikul leh Sande Sikul an buatsaih leh ta a. Chhiar tura min duh Pathian Thu, Bible lehlin hna an tan ta bawk a. Aizawla Kum li an awm chhungin Chanchin tha bu hnih leh Tirhkohte Thiltih an letling hman a. Bible Society in an chhut sak a, Pathian thu chhiar tur min pe ta.
BMS tirhin Zoramah an lo chhuak leh a, Bible lehlin hna an chhunzawm a, 1916 kumah Thuthlung Thar bu pum chhiar tûr kan nei ta. Pu Buanga khan hna pui berah a nei a, 1932 kuma a hawn hmain Sam, Genesis, Isaia bute a letling hman a. Bible Society-in an chhu chhuak zêl a, Thuthlung Hlui bu pawh chhiar tûr kan nei ta.
A hawn hnuin missionary chhim leh hmara awmte kohhran hruaitu hmasaten chhim leh hmarah Translation Committee siamin an chhunzawm ta a. Kum 1957 tâwpah lehlin hna zawh fel a ni a. Kum 1959 ah chuan Bible Society-in Mizo Bible hmasa ber chu min rawn chhawp chhuahsak ta a. Serkawna he Mizo Bible a rawn thlen ni chu 8 September, 1959 a ni. Lehlin hun chhung hi kum 65 a ni a, tunah kum 60 niin diamond Jubilee kan lawm ta a ni.
Lungleia lawmna inkhawm 6th September ah Lunglei South leh Lunglei North Bible Society Branch tang kawpin BCM Venglai Biak inah neih a ni a. Aizawlah Aizawl Auxiliary BSI buatsaihin September 8 Pathianni zanah Mission Veng Presbyterian Biak inah neih a ni.
Kan ram tidanglama siam thaa, timawitu Pathian thu kan nei hi a hluin kan vannei a. Min petu Pathian leh a hmanrua mihring leh Bible Society avangin lawmthu i sawi mawlh mawlh ang u. Bible chhiar uar ila, mahni tawnga la nei ve loten an neih theih nân Bible Society rawngbawlna ah thahnemngai lehzualin i tel zel ang u. LALPA KAN LAWM E, PATHIAN LEHKHABU THIANGHLIM MIN PEK AVANGIN.
