KOHHRAN (THE CHURCH)
Rev C.D. Lawma (L)
Bible hian khawvela hmuh theih kohhran hi, kohhran ti a pawm bik a nei lova. Leiah hian hmuhtheih Lu (Visible head) a nei lova, hmuh theih loh Lu, Isua Krista chauh a nei. Kohhran, Krista taksa tih hian piangthar dik tak, Thlarau thianghlim siam that tawh a huam vek a ni. (“The Bible does not recognize any one visible church on earth as the church”. B.B Doctrine P.337)
Kohhran hrilhfiahna (Definition) : Kohhran hi Thuthlungthar Institution, Penticost atanga intan, Krista lo kal leh huna, Kohhran seng chhoh an nih huna tawp tur ni in a lang. Grik tawng Ecclesia chu koh chhuah tihna a ni a. Kristiante chu Setana chhungkua, khawvel awmphung atanga koh chhuah, piangthar, Krista hnena awm tur an ni.
Qahal : Hebrai tawnga Qahal hi koh chhuah tihna bawk a ni a. Thubuai ngaihtuahtu council memberten, thubuai ngaihtuah tur an neihin, roreltu member an in ko khawm thin a. Roreltu member kohna Tawtawrawt ham dan mumal tak an nei a. Chutiangin tawtawrawt hamtu chuan tlang atangin tawtawrawt a ham ri ruai ruai a, member chuan thubuai ngaihtuah tur a awm a ni tih hriain chu kohna chu ngai pawimawhin Rorelna hmun chu an pan nghal thin. Mipui vantlang leh chhungkaw zing atanga Qahal chhuah niin an kal khawm a, an tih tur dik tak thubuai ngaihtuah chu an tan nghal thin a. Hei hi Kohhran lo chhuah dan tawngkam bul a ni.
Kohhran pawh hi Pathianin Isua Krista-in min qahal chhuak a, Setana leh khawvel atangin kan kal chhuak khawm a, tih tur neiin min ko chhuak a, kan tih tur chu Thlarau bo, zurui, drugs addict, hur ngawl vei, Biak In thleng phak lo te, Krista ke bula hruai thleng turin koh chhuah kan ni. Grik tawnga ‘Hamartia’ tih hi sual tihna a ni. Hamartia tih chu Tum thelh tihna a ni bawk a. Min kohchhuah chhan a tum kan tih loh chuan sualah kan tlu, kohhran hi sualah a tlu tihna a ni ang. Nang sualah i tlu em? Tute nge i hruai kir tawh? Nu leh Pa tam tak chu kan mangang a, tihngaihna hre lovin kan then tlawk tlawk ta mai a nih hi !
Kohhran leh Pathian ram danglamna engnge ni? Mathaia 13-a tehkhin thu-ah chuan Pathian ram hian a chhia leh a tha a huam tlat a, a tak leh a lem to za turin a ti. Kohhran hi Pathian ram huam chhunga awm a ni a. Pathian ram Judaten an duh lohva chu Messia lo kal hunah a ni dawn.
Kohhran Innghahna (The foundation of the church) : Matthaia 16 : 16-18 – “He lungpui chungah hian ka kohhranho ka rem chho vang” Kohhran chu Isua, hmangaihna lungpui chungah a innghat a ni. Lung che thei (Moveable stone) hi Petros an ti a, Lungpui nghet che thei lo Isua chu Petra Grik tawngin an ti a, lung che thei Petera, Petros chungah ni lovin, lungpui nghet che thei lo Isua, Petra hi kohhran innghahna foundation chu a ni.
Kohhran hmuhtheih (Visible Church) : Tualchhung kohhran hming bu a, ziakte, a tak leh a lem, a chhia leh a tha, engmah thliar hrang chuang lovin hmuh theih kohhran innghahna foundation chu a ni.
Kohhran hmuh theih loh (Invisible Church) : Kohhran hmuh theih loh chu, Piangthar, Beramno Nunna bua hming ziakte chauh an ni.(Thupuan 21:27). Nang hmuh theih kohhran mai nge i nih hmuh theih loh kohhran? Hmuh theih mihringah hian hmuh theih loh, van luahtu tur chu a inphum tur a ni.
Local church leh Universal church danglamna : Khawi hmunah pawh, hmun khata awm a, Biak Ina lawi hote hi Tualchhung kohhran tih an ni a.
Khawi hmun ami pawh, khawvela ringtu zawng zawngte hi kohhran pakhat Universal church hian a huam vek a ni.
The actual church (Kohhran tak tak) : Kohhran la famkim lo, Krista zara famkimna lam pan mekte hi actual Church tih an ni.
The Ideal Church : Kohhran dik tak vana kal tawhte, thi te hi an ni.
The Church Militant : Khawvela ringtu raldo mekte hi an ni.
The Church Triumphant : Ringtu dik tak kohhran member thi ta, kal hmasa ta zawng zawngte hi, Kohhran hnehtu, vana kal tawh, The Church Triumphant tih a ni.