AMEN, HNEHNA FAMKIM CHU LALPA TA A NI
Tv.H.Lalrinawma
Easter Chibai vek ule. Vawiin ni ang hi awm ta lo se chuan Kristiante ‘Rinna’ te, kan thil buaipui thin “Rawngbawlna” kan tih zawng zawng te, khawvel mihring zawng zawng tluklehdingawn 7.71 aia tam mah zing a Kristian (Roman Catholic leh Protestants) member tluklehdingawn 2.2 awm ve te Kum tin thawhchhuah US Dollar tluklehdingawn 7000 zet te, Biak In ropui tak tak te, Pathian hnena kan tawngtai thin te, Lalpa faka kan lam mup mup te hian awmzia a nei dawn reng reng lo tihna a lo ni ang. ( Source : http://www.thetravelingteam.org/stats). Engvang chuan maw? Lalpa Pathian hian mihring te hi min siam chungnung em em a, thiltihtheihna leh ropuina te pawh min pe ve a, thinlung sak tak, a changa nem leh em em thei nen. He thinlung hian eng/tu emaw a ‘rin’ dawn chuan a ‘rin tur’ ‘rinawmzia’ a hriat chian emaw a hmuh hmasak emaw phawt thin a ngai a ni mi puitling pangngai ah chuan. Kan zavai hian keimahni khawvel ah theuh hian ‘lalnu’, ‘lalpa’, ‘lal fapa’, ‘lal fanu’ te kan ni vek hlawm a, chumi mil chuan thil kan thlir in kan khawvel theuhah ro kan rel ta thin ni hian ka hria a ni. Mi in ang lo na fam chu ngaihdan, hriatdan, hmuhdan a lo danglam lo thei lo a, chumi anih avang chuan kan lo heti zo ta a ni. Kohhran chi hrang hrang tam em em ziate hi. Amaherawh chu mihring zawng zawng hian hlauh thuhmun kan nei a, chu chu ‘thihna’ hi a ni. He thihna duhloh vang hian khawvel hian nitin Dollar tluklehdingawn tam tak kan sen reng atang te hian thihna hi kan duh lo a ni tih a chiang em em a ni. Mihring, mahni tawka chapo ve tak leh induh tawk ve tak te’n a kan ngam miah loh ‘thihna’ atanga min chhanchhuak theitu chu ‘thawhlehna’ hi a ni. He khawvelah hian mi ropui, chak leh thiltithei eng emaw zat an lo awm ve tawh a, an thi a, an chanchin chu thawnthu ah a chang thin. Kan Lalpa Isua thawhlehna hian ‘Eng emawni ve a inhre thin’ ‘Mihringte’ min dah ‘nil’ chiang em em a, chuvang chuan a ni inthlahrung hauh lo a kan ‘rin’ a, kan ‘biak’ tak ni! Harsatna leh manganna kan tawh chang hian keini aia harsa leh thitithei lo zawk te hi kan pan ngai meuh lo nia! Sam 121 ah pawh khan tanpuina zawngin chunglam hawiin tlang lamah a dak chho a ni. Chuvangin, Lalpa thawhlehna hi ‘Mihring, chapo ve, nei ve tawk leh induh tawk ve tak ni thin’ tan hian a pawimawh em em a ni. Khaikhinna Pian dan thuah Lal Isua pian tur thu kha Kum 700 hma lamah zawlnei Isaia’n min hrilh tawh. Midang an awm ve em? Aw, awm ve e. Samuela, Samsona, Baptistu Johana te pian tur thu pawh kha hrilhlawk a ni ve tho alawm. A special fal lo niin a lang. Thilmak tiin Lal Isua chuan zeng te a kaitho a, phar te a tithianghlim a, natna chi hrang hrang a tidam a. Ni e, tunlai ah pawh Doctor te leh tawngtai dam theite pawn an tidam ve reng tho alawm. Lal Isua thilmak tihte chutia han special fal nalh a nih loh theihna a awm leh ta. Kross-ah khenbeh a ni. Hei phei chu a danglam lo lehzual. Mi tam tak Kraws-ah an khengbet thin a ni. Thihna hnehin a tho leh. Hei hi chu a dang ta zak mai. Lal Isua khan a thih atanga a ni thum ni-ah a tho leh dawn tih a sawi lawk a, hetiang tho hian mi thenkhatin an lo sawi ve tawh thin a ni awm e. Mahse, kan Lal Isua chauh hi ‘tho leh’ awm chhun chu a lo ni. Lo tho leh ta lo se chuan ‘danglamna’ leh ‘A Pathianna’ bik a awm dawn reng reng lo tihna a lo ni. Mihringte hriatthiam dana engkim tawpna ‘thihna’ hneha a ‘thawhlehna’ hian tawp chin nei mihringte min ti thlamuang a. Zui tlak, innghahna tlak, rintlak leh thiltithei Pathian tiin ngaihngam takin kan rinna zawng zawng nghatin kan zui theih phah ta a ni.
Tlangkawmna: Mihringte hi kan mak ve khawp a, thil hi hriatthiam kher kan duh thin ni hian a lang a. Lal Isua khan a hnehna (Setana nena an in beihna) kha Kraws-ah a puang tawh a. Kha ban phara a thihna kha mihring hriatthiam zawng ‘hnehna’ a ni ve tlat lo. Thihnate chu tlawmna angin kan hrethiam zawk si a. Chu chu Lalpa ngei chuan a hrethiam em em a mihringte hriatthiam theih zawng a a ‘Tho leh’ ngat mai te kha a van ropui em! He thawhlehna ropui tak hian khawvel puma Kristian tluklehdigawn 2.2 zette min phuar khawm a, thihna piahah hian chatuan nunna kan nei dawn a ni, tiin beiseina nung kan neih phah ta a lo ni. Thihna hneha tho leh Kan Lalpa Isua Krista chu fak leh chawimawiin awm kumkhua rawh se. AMEN.