REPORT TAWI
R.Lalhmangaihzuali
BCM Missionary
Ngengpuikai

Dt.29.12.2021-ah rawngbawlna zau zawk nei ve thei turin Ngengpuitlang chu ka thleng ve ta hlawl a. Mahni insitna tam tak nei chung siin Tirhkoh Paula’n, “Mi tichak tuah chuan engkim ka ti thei a ni,” a tih chang rinchhan chungin rawngbawlna bul ka tan ve ta a ni. A hmasa berin hetiang hi kan Kohhran dinhmun tlangpui hetiang hi a ni e.
Kan awmna hi Bru Home Mission hnuaiah niin BCM Ngengpuitlangah kan lawi a. BCM Ngengpuitlang Kohhran hi kum 1943-a din a ni a, kum 1982-ah Lairam Isua Krista Baptist Kohhran (LIKBK) lo lutin Baptist Kohhran hi thiah a ni a. LIKBK-ah Kohhran pumpui hi an lut a ni. Tichuan, kum 2009-ah Baptist Churh of Mizoram (BCM) din that leh niin, tuna kan lawina Kohhran hi a lo ni ta a. Zawi zawiin a kal chho ve bek bek ta a ni e.
Tuna kan Kohhran dinhmun : Kohhran member hi 150 niin, BMP an awm lo va. BKHP, TKP leh KNP te erawh chu kan la kal ve hram hram a ni.
BKHP member hi 35 an ni a, TKP member hi 41 (Mipa-35, hmeichhia-6) niin, KNP hi member 30 an ni.
Helai hmunah hian kan rawngbawlna chhan bul pakhat chu Zirna (School) a ni a. Baptist Mission School niin, KG-I atanga pawl riat thleng zirna a awm mek a ni. Zirtirtu hi pariat (8) awmin, BCM hnuai atangin mi pali (4), BCM Lawngtlai Vengpui sponsor pakhat (1), Voluntary pakhat (1) leh Casual Teacher pahnih (2) kan awm mek a ni.
Biak In sa lai kan ni a, Kohhran member-te chu heti mai hi kan ni ve bawk si a. Pathian rinchhan tak meuhin Biak In hi kan sual ve a. Sum tuak pah chung zelin a theih ang angin kan sa chho ve bek bek zel a ni. Kohhran hote leh ka TKP member puite in theih ang angin tawngtainaah min lo hre ve reng turin ka han ngen pah duh bawk che u a ni.
Helai hmun thleng thei tur hian keima chaknain ka kal lo va. Pathian leh Kohhran hote leh ka TKP member puite min tawngtai sakna avanga rawngbawl ve thei chauh ka ni a. Mi tling lo, fel lo leh chak lo berte zing ami ka ni a. Amaherawhchu, mi tling lote thlang chhuaktu Pathian a nihna lanchhuahna ka ni tih erawh ka inhrechiang hle.
Pathian rorel dan hi mihringte hriatthiam phak loh a ni. Kan tih theih loh tam takte hi Ama hming avang chuan tithei dinhmunah min lo dah sak ve a. Remruattu Maka a nihna leh Pathian Chaka a nihna te keimah ngei pawhin ka tem ve a. Thingtlang zawk nun pala, meikhu leh meizial khu luih luih kara rawngbawl hrehawm leh harsa ka tih em em kha a hun takah min lo siam rem sak zel a. Tunah chuan meizial khu pawhin min tibuai thei tawh lo. A remruat ang zela lo awm hi a tha ber a ni tih ka hriat thar phahna a lo ni reng mai. Mihringin harsa kan tihte hi Pathian tan chuan harsa a awm lo. Amaha innghah chauh mai hi a duh ber a lo ni si. A tawp berah chuan ‘tuar ve’ ka intih te hi a nepzia ka hria a, nep tak a ni. Amaherawhchu, hengte avanga Lal Isuan kan a tawrh nasatzia te, ka tan a tih zozai te hi kei mimawl hian ka ngaihtuah nasat phah em em a. Pathian min hmangaihna ropui leh rilzia hi keia ngaihtuah chhuah zawh rual a nih lohzia te, a themthiamzia leh a khawngaihna leh zahngaihna nasatzia hi a them pawh ka la hmuchhuak zo lo hle hian ka inhria. Chutiang ni mah ila, a khawngaihna ka chan nasatzia leh a thiltihtheihna a hun taka a rawn lanchhuahtir thin ka hmuh hian, Pathian rawngbawl thatzia leh chu aia hlu a awm chuan lohzia min hriat nawntir fo thin. Amaherawhchu, hmabak erawh ka la ngahzia ka hria.
Ka thalaipui duhtakte u, kan hun hmawr tawhzia leh hun thim kan tawn chhoh mekah hian Pathian khawngaihna leh hmangaihna hre fiah deuh deuhtu ni turin leh kan awmna hmuh theuhah rawngbawltu tha tak ni theuh turin kan insawmin kan infuih a ni e.
(Nl.Tetei hi kan TKP member pui duhawm tak niin tunah hian BCM Ngengpuikai-ah Missionary rawngbawl hna a thawk mek a. Hetiang mi nula chhuanawm leh fel kan nei hi TKP Serkawn Unit ten kan chhuang em em a. Kan ngenna anga rawngbawlna chanchin tawi leh thuchah ngaihnawm tak min ziah sak hi kan lawm hle a ni. A rawngbawlna zel turah duhsakna kan hlan rualin kan lo tawngtaipui zel bawk e.)