ALL-ROUNDER ISUA I CHHANG ANG
K.Lalengmawia
BCM Missionary
Bhutan Field

Pathian hruainain kum 2022 February thla Pathianni hnuhnung ber kan lo chuangkai leh ta reng mai. Kan hun kal tawh kan thlir let chuan thil tam tak hriatreng tlak kan tih leh kan duh chiah loh kan tihte a awm teuh maithei a ni. Duhthlanna dik kan siam a awm ang nga, duhthlanna kan thlan sual pawh a awm ngei ang.
Chanchin Tha Johana 3:16 kan chhiar chuan Pathianin khawvel a hmangaih em em a; chutichuan, a Fapa Isua chu khawvelah a rawn tirh thu kan hmu a ni. He thu hi chu Sunday School kal tawh phawt chuan kan hre chiang viau awm e, mahse kan hre ringawt nge kan nunah kan seng lut tak tak tih chu kan in hre theuh awm e.
Dt. 13 February, 2022 chhun atanga zan dar 9:00pm dawn thleng khan kum 2022 a India Premier League (IPL) cricket khel tur player lilamna hun an nei a, Club hrang hrang ten an club a khel turin Player te an lei khawm a ni. Chumi zingah chuan Ishan Kishan a chu Player man to ber ni turin Mumbai Indians Club chuan cheng nuai 1525 in an lei a ni. Cheng nuai khat chu tam tak a ni a, Cheng nuai 100 phei chu kan dam chhung hian tam tak chuan kan nei kher lo mai thei a ni. Cheng Nuai 1525 chu tam tak hi a ni tawp mai a ni. He player hi a man han en chuan khelmualah a tha hle ang tih a hriat a ni. Cricket khawvelah hian miin an ngaihsan leh ropui an tih chu All-rounders (chi hrang hranga hman theih ball vawm thei, ball vaw thei bawk, wicket chang thei bawk etc. ang chi) hi an ni. India player-ah chuan Kapil Dev hi All-rounder tha ber a ni a, a hun lai chuan India pawhin World Cup Cricket an chawi reng a nih kha. Mahse, Ishan-a hi chu wicketkeeper leh Batman chauh niin all-rounder chu a ni lo a ni. A man zat atanga teh chuan a club khelh na chu champion pui a India pawh chakpui thei ngei tur a ni.
Khelmual pawnah chuan tangkaina a nei em em lo maithei, India ram a venghim thei kher lo ang, khawvel pawh remna leh thlamuanna a pe thei kher lo ang tih a chiang reng mai. Mihringte hi kan thiam thil neih atang hian kan man nei dawn ta ila khawvel zawng zawnga mihringte man hi a tam ngawtin a rinawm a ni. Mizo hmeichhe man hi a tlangpuiin ^ 420 a ni a. khawvelah hian mihring damlai tluklehdingawn 7.9 chuang kan awm a, chu chu mizo hmeichhe man zat hian chhawkrualin chhut ta ila a tam dan tur chu kan hrethiam vek ang chu. I korinth 6:20-ah chuan mana lei kan nih thu kan hmu a ni. Min leina man hi a va tam dawn em, khawvel mihring damlai leh thi tawh zawng zawng lei tur chuan a man pek tam a va ngai dawn em. A hlutna chu chhut chhuah phak rual a ni lo ang. Mahse, Pathianin a fapa Isua krista hmangin min tlan/ min lei a nih chu!! Lalpa chu fakin awm rawh se.
Isua Krista hlut zia hi kan chhut ngai em? Kan ngaihtuah ve ngai em? Khawvel pawisa nena khaikhin chi pawh a ni lo a ni, a hlu lutuk a. He IPL player pakhat Nuai 1525 mana an lei hian kum khat atan chauh club tan hian a khel dawn a champion pui thei a ngem? Club tan hian a thih ngai tase a thi duh a ngem? “Club tan a thi tura lei i ni a, i thih chuan kan Club hi kan champion dawn a ni,” ti ta se, a duh a rinawm chuang lo a ni.
Awle, Isua Krista kan tan a All-rounder tha chungchuang hlawhchham ve ngailo, Amah beisei tute tibeidawng ngai lo chu Van Pathianin khawvelah rawn lilamin kan damna turin a rawn zuar a, a hlutna chu kan tan damna famkim leh chatuan a nunna a ni a. Khawvel sum leh thil hluin a hen zo lo a ni. Mahse, a man hi hlu em em siin mitinte lei phak a ni lawi si a nih chu. A man chu maw; Lal leh chhandamtua pawm a, atan rinawma awm tawp a ni. He khawvel hringnun khelmualah hian mitin mamawh Isua chu lalutin, a hlutna leh thatna zawng zawng leh a ropuina midangte hnena puan darh leh hrilh hi kan man pek let ve theihna chu a ni a, chutiang a ti tur chuan Isua Krista engkim a engkimtithei (all-rounder) hi kan nunah, kan chhungkuaah cheng turin i chhang nawn leh theuh ang u.
(Juniper atana hlu ber leh kan mamawh ber chu sermon hi a ni a. Sermon ngaihnawm leh tha tak mai kan ngenna anga min lo ziah sak avangin Pu Enga chungah kan lawm hle a ni. Ani hi an chhungkuain Bhutan field-ah Missionary-in an awm mek a. TKP member ten kan remchan dan ang zelin i tawngtaipui thin ang u.)