THAWHRIMNA

THUFINGTE 14:23
Thawhrim chuan rah a nei thîn a, A sawia sawi ringawt chuan tlâkchhamna a thlen.
Sawi tam hi a awl em em a, chutihrual chuan thawh tam a har leh em em mai bawk si a. Thil tihna kawngah a thu-a han rêl chiam hi a hlawhtlinna a ni ber lo va. Mi tam tak chuan an sawi leh an tawngkam hi an um pha lo fo thin a ni.
President Theodore Roosevelt-a kan hre theuhin a rinawm. Rampalailenga sapelh nuam timi leh phûr thei em em mai a ni a, infiamna lam pawh a nuam tih zâwng a ni. Mahse mi tlêmtein humhalhtu ropui a nih an hria. A chhan chu a sawi tam lo va, humhalhna kawngah a thawk tam thung a ni.
President a nih hma kum 1887 khan Dakota ram bial-a sa pêl thin a ni a. Vawi khat chu chulai ram biala thingkûngte chu duhdah taka kih tlûk thin a nih avangin ramsa tam takte chu an rêm avangin a rilru a khawih em em a. Thing leh mau an hring tawh lo va, lui tui luang fîm tak takte pawh an bo zo va, thlalêr an chang zo ta a ni ber.
Phûr taka a ramvâk thin pawh hnualna nasa tak a neih phah a, mahse Roosevelt-a chuan sawi mai lovin a thawk ta a. America rampalaileng humhalh tûrin Boone and Crockett Club a din ta a. Chu pâwl chu a lo thang lian zêl a, nasa takin mi hmuh loh laiin an thawk a, ram rorêlna sâng beng a lo thleng ta hial mai a. Chu chuan rah chhuah duhawm tak a rawn nei ta a.
Ram rorêltute chuan Yellowstone National Park enkawlna leh ngaihsakna kawngah nasa taka hma la tûrin thu a dah ta a. California rama thing rêm mai tur Sequoia thing te, sava chi hrang hrang rêm mai tûr te, lui lama chêng te thleng chuan a humhalh ta a. Chu mai piah lamah chuan duh dân dâna miten sa an pelh theih lohna tûrin dân tha tak a zam ta hial bawk a ni.
Thil tha tak a chhuah theihna tûr atâna thawktu chu dawhthei takin a awm thin.