KRAWS KIANGAH
(Bible Chang: Johana 19:23-30)

“Isu kraws mi hnaih tir rawh, tuikhur hlu awmna chu…” tih hla kan sak thin ang hian Kraws atang hian engtianga hlaah nge kan awm? Kraws kiangah kan ding chiah em? tih te han mahni inzawt ila. Kan tan Kraws hi engnge a nih chiah tih kan inenfiah nan Krista Kraws chungchang hi kan sawi dawn a ni.
Kraws a Isua an khenbeh lai khan Kraws kiangah tute nge awm? Chanchin Tha Johana ziaka kan hmuh danin Isua khenbeh laiin mi tam tak kraws kiangah an awm. Heng mite hi Johana’n an hming a sawi, kraws kianga awm kan hmuh te chu an ni:
= Isua khengbettu, Rom sipai pali, an hna (duty) vanga awm
= Hmangaih Johana, Mari (Isua nu), Mari Magdalini (ramhuai zawl, Isuan a tihdam), Shalom-i (Isua nu Mari unaunu)- Heng mite hi Isua an hmangaih vanga kraws bula awm an ni.
Kraws bula awm te nun leh thil tawn atang hian Kraws chu eng ang nge a nih i han bihchiang teh ang.
1. Kraws chu tlan chhuahna hmun a ni: Mari Magdalini nun atangin – Luka 8:2 a kan hmuh angin Mari Magdalini hi ramhuai zawl thin a ni a, Isua’n a tidam a ni. He nu hi Isua nen an intawh hma hian ramhuai thuneihna hnuaiah, thim lal setana hnuaiah a kun a, tih retheihin, tih mualpho a ni thin. Isua nen an intawk a, Isuan amah tibuaitu sual thiltihtheihna a hnehsak a, a tlanchhuak a, a chhandam ta. Magdalini tan hian amah Chhandamtu, sual thiltihtheihna lak ata chhanchhuaktu Krista chu a kalna apiangah a zui lo thei lo. Harsa mahse, bumboh mahse a zui zel a, Kraws thlengin a zui a ni.
Zu leh ruihhlo bawihah kan tang a, sual kawng thuk tak kan zawh a, Krista chhanchhuahna kan chan thu kan puangchhuak a, hlim takin kan lam a, kan lawm a. Mahse, chawlhkar khat pawh kan zui leh peih lo fo thin hi chu inenfiah a ngai lo maw? Tlanchhuah kan nihna hi a la chiang tawk lo a ni mai lo maw? Tlannaa chiang tawhtu tan Krista hi Kraws thlenga zui loh theih a ni dawn em ni?
2. Kraws chu inlamletna hmun a ni: Shalomi nun atangin – Shalom-i hi Zebedaia nupui a ni a, Isua nu, Mari unaunu a ni. Fapa pahnih, Jakob-a leh Johana te a nei a (Mathaia 20:20-23). Shalom-i hian Krista kianga rawngbawl leh Krista ding leh veia awm chu dinhmun ropui leh tha niin a ngai thin a, a fapa pahnih te tan hian Isua hnenah Isua ding leh veia awm a dil sak thin a ni. Isuan Shalom-i hnenah “In dil chu in hre lo a ni. Ka no in tur chu in in thei em ni?” (Mat 20:22) a ti a nih kha, mahse Shalom-i hian Isua sawi hi a hriatthiam pui phak ngai lo.
Kraws kiangah, Isua chu misual pahnih inkara khaikana a awm a hmuh hnuah chuan Shalom-i ngaihdan a inthlak danglam a, a thinlung a inthlakthleng ta. Kraws chu amah leh a fapate phurh zawh rual a lo ni lo tih a hrechhuak a, Isua ding leh veia rawngbawl hna chu a fapate tan a na lutuk tih a hrechhuak a, lungchhe takin a tap ta a. Krista tana kan thawh ve te hi mite fak hlawhna leh ropuina tur emaw kan tih chuan kan tisual ang. Krista Kraws kawng hi hmusit leh endawng, thihna kawng a ni.
3.Kraws chu lawmman hmuhna hmun a ni: Isua nu Mari atangin – Mari hi Isua vanga hah leh tuar nasa ber a ni hial awm e. Isua hian heti taka amah hahpuia enkawltu Mari lawmman a pekna hmun hi Kraws-ah zuk ni tlat a! A mak ka ti thin. Kraws ler atangin Isua khan a nu Mari kha a enkawltu tur fapa thar (Johana) a pe a nih kha (Johana 19:27). Kan rawngbawlna kawngah hian khawiah nge lawmman kan zawn thin le? Kan rawngbawlpuite fakna tawngkam te, mite ngaihsannate kan beisei thin em le? Kan rawngbawlna leh Krista tana kan thawhna vanga lawmman kan hmuhna hmun tur chu Kraws-ah zawk a ni. I rawngbawlna vangin sawisel leh nuihzat i hlawh a nih pawhin beidawng mai suh, Kraws thlengin bawl zel la, tah chuan lawmman i hmu ngei ang.
4. Kraws chuan mawhphurhna thar min pe: Hmangaih Johana nun atangin: Isua an man zan khan a zirtirte khan an phatsan a, an tlanbo san vek a ni. Mahse, zirtir dang te aia Johana a danglamna chu Isua an khenbeh laiin Kraws-ah a kir a ni. Kraws atangin Lal Isua chuan Johana hi “Phatsantu” tiin a lo hnawl lo. A nihna ang angin a lo la pawm a, A (Isua) lei ro hlu ber leh a neihchhun, a nu Mari enkawltu nihna, mawhphurhna thar a lo pe a ni. A hma zan lawka Isua phatsantu Johana hian he rawngbawlna hi a phu lo hle a ni.
Krista tana rinawm zo lo, phatsan thintute vek ni mah ila, Kraws-a kan kir leh hian Kraws hian min lo hnawl ve ngai lo, hmangaihnaa min lo kuangkuahin mawhphurhna thar min pe zel thin zawk a ni, Lalpa chu fakin awm rawh se.Khawngaihna vangin Kraws-ah min pawm leh thin lo se chuan vawiinah hian Pastor ni tlak an awm tawh lovang a, Kohhran Upa ni tlak an awm tawh lovang, Kohhran member ni tlak pakhat mah an awm tawh lovang.
Kan nitin nunah Krista hnung zui zo lovin tling lo thin mah ila, Phatsantu leh tlanchhiatsantute ni mah ila, khawngaihna vanga min pawm lehna Kraws-ah hian i kir thin ang u.
A tawp nan, Kraws kianga awm ve, a khengbettu Rom sipaite khan an duty a nih vangin Isua kha an khengbet mai a ni a, an duty a nih angin a hnuk chah hma chuan rinawm takin an veng mai a. Isua a thi a, khawvel a lo thim a, lir a lo nghing a, Pathian hnathawh lo thleng zawng zawng an hmu ve ta vek a, Chanchin Tha Mathaia ziakah heti hian kan hmu a- “ Tin, sipai za hotu leh a hnena Isua venga awm vete chuan lirnghing leh thil awmziate chu an hmuhin an hlau ta em em a, “He mi hi Pathian Fapa a ni ngei mai,” an ti a”
Khang sipaite thinlungah engtinnge a thawh zui a, engtinnge an nun an hman zui kan hre lo. Pathian lam hawi lem lo leh Pathian ngaihsak hran lote zingah, pawlawh taka nunga mahni duty pawh hlen peih mang lote ai chuan rinawm taka mahni duty ti thinte hian Pathian hnathawh hmuhna hun remchang an nei zawk thin niin a lang. Khawchhak mifing te, berampu te leh a khengbettu sipai te nun atang te pawhin a lang chiang hle a ni.