PATHIAN NEN
Lalruatkima Renthlei
Tin, ani chuan a hnênah, “Kan zînga i tel ve zêl si loh chuan heta ta hi min hruai chhuak ma ta che” Exodus 33:15
Pathianin Mosia chu Israel fate Aigupta sal tanna ram ata hruai chhuak turin leh Ramtiam Kanana hruai lut turin a ti a. Mosia chuan Pathian thupek ang chuan Israel fate chu Aigupta ram atang chuan a hruai chhuak ta a. Ramtiam khawizu leh hnutetui luanna ram pana an kal lai chuan Israel fate chu Pathian duh loh zawngin an awm a, Pathian lakah an hel a. An chungah Pathian a thinur ta a. Pathianin Mosia a bia a, thu a lo tiam tawh ang chuan Abrahama te, Isaka te, Jakoba te hnena, ‘I thlahte tan ka la pe ang che’ (Exo 33:1) tia chhia a lo chham tawh ramah chuan Aigupta ram atanga a hruai chhuahte nen lut turin a ti ta a. A ramtiam hnutetui leh khawizu luanna ramah chuan Vantirhkohten an hmelma Kanaan hote, Amor-hote, Hit-hote, Periz-hote, Hiv-hote, Jubus-hote chu hnawtchhuak turin tirh a tum thu leh Israel fate luhlul leh Pathian lung an tihawi loh avanga an hnena kal ve tawh loh a tum thu a hrilh a. Chu thu mipuiin an hriat chuan an tap a, tumah reng reng an inchei duh ta lova.
Pathian nen lo hian a rawng a bawl theih a, a hnung a zui theih a ni tih hi a lang chiang hle a ni. Pathian tello hian rawng kan bawl em? Pathian tello hian a hnung kan zui em? Ringtute hi kan inngaihtuah ngun a ngai ta hle mai. Pathian rawngbawl inti ve si hian Pathian nen a ni lovang tih hi a hlauhawm a ni.
Mosia chuan Pathian hnenah, an zinga a tel ve dawn loh ai chuan Ramtiam, khawizu leh hnutetui luanna ram lam pan chu a duh ta lo a. Pathian chuan an zinga tel a intiam ta a ni. Kumthar 2019-ah hian keini pawh hian Pathian kan kar a ngai a ni. Pathian tello rawngbawlna, Pathian tello Kohhrana inhmanna hian Lalpa rawng hi kan lo bawl palh ang tih hi a hlauhawm a ni. Chuvang chuan Mosia anga he kumtharah hian Pathian kan hnena a awm ngei theih nan nasa lehzualin i dil ang u. Pathian nen rawng i bawl ang u.