MAHNI INTHUNUNNA
“Mahni rilru thunun zo lo mi chu khawpui chim, kulh nei lo ang a ni.” Thufingte 25:28
“Tin, thununna reng reng hi tuar lai chuan lawmawmin a lang lo va, lungchhiatthlakin a lang zawk thin; tuar hnuah erawh chuan, chu mia sawizawia awmte tan chuan rah thlamuanawm tak, felna chu a chhuahsak thin.” Hebrai 12:11
Khawvelah hian mi hlawhtling nih hi a tu-a-pawhin kan duh vek ang. Nimahsela, hlawhtlinna chang tur chuan mahni inthununna (self-discipline) kan neih hi a pawimawh hle a ni. Mahni inthunun theih hi kawng engkimah a hlâwk a, hlawhtlinna bulpui ber pawh a ni.
He kan chênna khawvelah hian mi hlawhtling ti-a chhâl tur hi mi thahnem tak an awm a, chûng zînga mi thenkhat chu mahni inthununna neih a pawimawhzia tar lan nan han hmang ta ila:-
1) EDMUND HILLARY: Edmund Hillary hi kan hre theuh awm e, khawvela tlâng sâng ber Mt. Everest lawn chhuak hmasa ber kha a ni a. Tum khat chu interviewer pakhat hian he tlâng chhip (Mt. Everest) lawn chhuak tur hian eng ang chiaha nasa in nge i beih? tiin thu a zawt a. Chuta Edmund Hillary chhânna chu, “He tlâng chhîp lawnchhuak tur hian a pawimawh ber chu mahni rilru inthunun theih hi a ni. He tlâng chhîp hi ka hneh a ni ngawt lova, keimah ka inhneh hmasa a ni’’ tiin a chhâng a ni.
2) PETER THE GREAT OF RUSSIA: Peter-a (682-1725) hi a thih ni thlenga Russian Empire awp bet tlat tu hian, heti hian mahni inthunun a pawimawhzia a sawi thung a: “Ram khat zau tak hi lak a harsa lo, ka duh hunah ka hneh thei. Nimahsela, ram ka lak leh ka hneh ai a harsa zawk ka tih chu, mahni inhneh/mahni inthunun hi a ni” tiin mahni inhneh/thunun a harsatzia a sawi thung a ni.
Ringtute nunkawngah pawh hian mahni inthununna/mahni rilru inhneh kan neih hi thil pawimawh tak a ni a, mahni pawh inthunun zo lo leh inhneh zo lo ringtu chu a hmaah thlêmna a tamin, a nasa bik êm êm a ni.
Mahni inthunun tih chu mahni rilru inhneh tihna a ni mai a, kan chhûngrila chakna leh sualna lam kawnga kan insûmtheihna pholanna leh târlanna a ni. Mahni inthunun theihna hian kawng engkimah hmasawnna min pe a, kan duhthusam ang kan tih puitlin theihna pawimawh tak a ni bawk.
Pathian thu pawhin ‘’Mahni inthunun zo lo mi chu khawpui chim kulh nei lo ang a ni’’ a ti a. Mahni rilru thunun leh hneh zo lo ringtu kan nih chuan, sualin kan rilru min hneh theihna kawng awlsam leh zau takin, kan hawng a ni tih kan hriat reng hi a pawimawh êm êm a ni.
Chuvangin, ringtu kawng engkima inthunun leh rilru in hneh thei mi kan nih a, kan rawngbawlna kan ko va tla theuh, hlen chhuak tu kan nih theih theuh na turin taihmak i chhuah leh sauh sauh ang u.