KA THLARAU ZAWKIN LE
Rev. Lalramngheta Chhangte

Babulon Lal Nebukanezaran Judate a hneh (BCE 587) khan Jerusalem Temple a rawk a, chuta tang chuan Temple chu a ram ta a ni. BCE 538-a Lal Kura a lo lal khan Judate kir lehna leh Jerusalem Temple sak that leh thu a pe a. Hna chu BCE 537 khan thawh nghal a ni a. Israel hnam thlahpawlh ho Samari mite chuan Temple saknaa tha thawh ve an dil a, mahse Juda leh Benjamina thlah hnam hruaitute chuan thlahpawlh an nih avangin rem an ti lo va. Samari mite lungawilo chuan Euphratis lui thlang lama ram awptute nena tang hovin Temple sak hna thawktute chu dodalin hel tumah an puh a. Chutia nasa taka an dodal avang chuan Temple sak chu thawh chhunzawm theih lovin a awm ta a. Persia Lal Daria I-na lal kum 2-na thlengin an chawl a ni. Hetih hun lai hian Zawlnei Hagaia leh Zakaria te lo langin Temple sak chu Pathian thiltum anih avangin mipuite chu thawk chhunzawm turin an fuih a. Tuna kan changthlan hi Pathianin zawlnei Zakaria hmanga Sealtiela fapa Zerubabela, Judai ram Governor a fuihna thu a ni. Zerubabela hi Messia lalna ram dinna tura kawng sialtu ni turin mi tam tak chuan an ngai nghe nghe.
Zakaria chuan Jerubabela chu ama lam inen lo va Pathian lam en zawk turin a fuih a. Mihring chakna an rin dawn chuan anmahni dodaltute chu an tamin an chak em em a. Ram awptute leh mi thiltithei tak takte bakah Babylon leh Persia lal ten anmahni dodal tute chu an thlawp avangin mihring chakna hmanga beih chuan hneh rual an ni lo va. Temple sak chhunzawm chu thil theih a ni lo. Chutia Zerubabela leh a hote tihngaihna hre lova an awm lai chuan Lalpa thu lo thleng chu “Chakna ni lovin thiltihtheihna ni hek lovin ka Thlarau zawkin le” tih a ni.
Pathian Thu ang takin Pathian Thlarauvin hna a thawk a, anmahni hektute hekna azarah chuan Lal Daria lal laiin Ectabana-a thil hlui dahna hmunah Lal Kuran Temple sak that tur thupek a chhuah chu hai chhuah a ni ta a. Dodaltute beisei loh takin, Temple sak thatna thupek awmsa chu tih thar leh a lo ni a, chu mai bakah Euphrates lui thlang lama chhiah chu Temple sak nan an mamawh ang zela hman phalsak an lo ni ta zawk a. Tichuan BCE 515-ah Temple chu sak zawh niin hlan a lo ni ta a ni.
Heta tang hian thil pahnih han la chhuak ta ila-
I. Pathian thiltihtheihnaa innghah a tha ber a ni – Mihring chaknate chu sipai ropui tak, hausakna, huaisenna, thahrui chakna, ropuina, theihna, sanna te a ni a. Mihring thlirnaah chuan Temple sak that dodaltute chu tam zawk leh thiltithei zawk an ni. Amaherawhchu, Pathian Thlarau hnathawh a lo thlen chuan Lalpa thil tum chu tihhlawhtlinin a lo awm ta a ni. Lalpa Thlarau engkim tithei, engkim chhuichhuak a, thil theih loh pawh theiha siamtu, chaklote tichaktu, dawihzepte tihuaisentu kuta innghah chu a tha ber a ni.
II. Pathianin hmanraw tam tak a nei a ni- Pathian chu khawvel leh a chhunga thil awm zawng zawngte neitu anih avangin hmanraw tam tak a nei. Lal Kura leh lal Daria, amah hrelo mi pawh a hmang mai a ni. Pathianin hmanraw tam tak hman tur a neih laia keini min hmang ve duh mai hi a va lawmawm em!
Kan hmaa Lalpa rawngbawlna tur awm apiang Pathian rinchhanin hmachhawn zel ang u. Kan hna chu Lalpa hna anih phawt chuan Aman a ti zel dawn a ni tih hria ila. Lalpaa innghatte chuan Lalpa Thlarau Thianghlim tanpuinain thil ropui takte an ti thin – chungte chuan rinnain ramte an la a, thil fel an ti a, thu tiamte an chang a, Sakeibaknei khate an tih chihsak a, mei thiltihtheihna an timit a, khandaih hriam lam an pumpelh a, chaklohna ata chak taka siamin an awm a, indonaah chuan mi hrat khawkheng an lo ni a, hnam dang indo pawlte an tlan chhiattir a. (Heb 11:33-34).
Keini pawh kan hmaa rawngbawlna tur – Chanchin Tha puandarhte, kan target leh project hrang hrang neih te, kal chhuak tura rawngbawlna emaw, awm hmuna tihtur awmte pawh hi Lalpaa innghatin hmachhawn ang u. A duh anga a hman atan inpe phawt mai ila, Lalpa Thlarauvin hna a thawh phawt chuan a hlawhtling ang tih hriain amah rinchhanin i kal zel ang u. Lalpan “Chakna nilovin thiltihtheihna ni hek lovin, ka Thlarau zawkin le” a ti si a.