LAWMZEL NUN

Philippi 4:11-13 – Ka tlakchham thu sawi zawng ka ni lo ve; kei zawng eng ang pawhin awm mah ila, lungawi zel ka ching tawh si a. Tlawm taka awm dan ka thiam a, hausaa awm dan pawh ka thiam bawk a; thil tinrengah leh thil zawng zawngah tlai leh riltama awm dan, hausa leh tlachhama awm dan thuruk chu ka hre chhuak tawh. Mi tichaktuah chuan engkim ka ti thei a ni.
Rom 12:15-18 -Lawmte chu lawmpui ula, tapte chu tahpui rawh u. Ngaihtuah hmunkhatin awm tawn theuh rawh u. Inngaihtuah sang lutuk suh ula, mi tete pawl zawk rawh u. Intifing suh u. Tu sual pawh sualin thungrul suh u. Mi zawng zawng ngaiha thil mawi ngaihtuah lawk rawh u. A theih phawt chuan nangmahni lam tal, mi zawng zawng nen inremin awm rawh u.
Background: Paula hian Philippi khuaa mite hnena lehkha a thawn hian tan ina tang a ni a. Rome khaw tan ina a tan lai AD 63/64 vela ziak niin a lang. Paula hian Philippi khuaa ringtute hnen atangin Epaphrodita kal tlangin thilpek tam tak a dawng a. Chung a thil dawnte avang chuan a lawm hle a. Amaherawhchu, thilpek a dawn vang maia lungawi a ni lo va, an thinlung atanga midangte ngaihsakna an neih chu Pathian atanga chhuak anih avangin an chungah a lawm em em a ni. Ani zawng eng ang pawhin awm se la, hausa emaw rethei emaw pawhin awm mah se la, lungawi zel nun a nei tawh a ni tih a sawi zawk a ni. Chu nun chu nun thiltithei, Kristian puitling nun, Nun ropui, Krista nun tawmpuitu nun a ni.
Chu nun lungawi awmdan tur chu Rom 12:15-18-ah hian kan hmu a. Chutiang nun neitu chu a inngaihtuah sang lo va, mi te te pawlin an tan pawh kawm theihin a awm thin a. A intifing lo va, sual sualin a thungrul ve ngai lo va, midangte tlin lohna a hmu lian ve ngai lo va, hmangaihna nen dawmkan a tum zawk thin. Mi zawng zawng ngaiha mawi a ngaihtuah thin avangin tawngkam leh thiltihah a fimkhur a, midangte tana hnawksaka awmloh a tum tlat thin a. Amahin midangte a rem tlat thin avangin midangte tan pawh huat theih a ni lo.
Keini chu lungawilohna kan hmu hma thei hle thin. Kohhran hruaitute tlin lohna leh fellohna kan hmu a kan lungawi lo va, an tana tawngtai tum si lovin inkhawm te kan han tui lo ve leh ngawt mai thin a. A then phei chuan sawiselna tur kan dap a, kan phunnawi reng mai a. Paula ang hian lungawi zel nun neih i tum ang u. Paula chuan harsatna ei leh bar, silh leh fen, dam loh leh hrisel lohna pawh tawkin awm mah se, lungawi zel a ching tawh a ni tih a sawi thei hi a va han entawn tlak em.
Lawm te lawmpui theihna te pawh hi lungawina nun atang lo chuan a lo awm thei reng reng lo mai. Chutiang bawkin thinlung chhungrila tapte tahpui theihna, an khawvela va chen ve hial theihna pawh hi he lungawi nun atang tho hian a lo chhuak thin a ni.
Hla phuahtu chuan ‘Engkima lungawi zelin khenbeh nun ka chhar’ tiin a lo sawi a. Lungawi zelna hi khenbeh nun chhar theihna a ni a, chu khenbeh nun chu Lal Isua zuitu tak takte nunah a langchhuak thin a ni. Sual leh, khawvel laka khenbeh nun neitu chu a lungawi thin a. A phunnnawi ve ngai lo. Keini hian eng nun nge kan neih ve le? Lungawi leh lawm zel nun neia Krista anna-a thang lian zel tur kan ni tih hriain kan hun lo kal zel turah Paula anga nun thiltithei, engkima lungawi zel neih i tum tlat ang u.