KRISTA MI MAN CHHAN CHU

Philipi 3:12 “Hmu tawh reng in ti ka ni lo va, famkim tawh reng inti pawh ka ni hek lo; “Krista mi man chhan chu ka man thei dah law maw” tiin a umin ka um zawk a ni.”
Helai thu hi thu fiah si fiah si lo ang deuh hi a ni a. Kristian te chuan Lalpan he khawvela min dah chhan hi kan ngaihtuah ve theuh thinin a rinawm. Tun tumah hian kei ngei pawh hian ka hre fiah tak tak bik chuang si lo a ni. Amaherawhchu, ka hre ve ruai ruai ni hian ka hre lawi si. Krista’n min man chhan hrang hrang ni a langte kan han thai lang dawn a ni.
1. Mihring fel lo hi, Krista-ah chuan a fel thei a ni tih a lan tir theih nan: He thu ka chhiar apiang hian van lam hawi Pathian mitthla hian ka nui suk thin. Pathian hian mi fello te a thlang thin, mi sualte a thlang thin. Engvangin, a thlangtu Pathian hian a tifel thei a ni tih hi a hriat chian em avangin, inchhuanna tur erawh chu a awm lo. Meizial nghei thei miah lo kha Pathianin min han nghei tir a, zu in mi te a sim tir a, drug tel lo a nung thei lo te a chhuah zalen a. A chhan chu Pathian in fello hi mifelah a tlin tir thei a ni. Lalpa chu fakin awm rawh se. Kan felna erawh chu kan chhuang tur a ni lo. Min tifeltu Krista Kraws chu chawimawiin awm zawk rawh se. I Korinth 1:31 “A chhuang apiangin Lalpa chhuang rawh se.”
2. Krista chanchin puang chhuak turin: Min chhandamtu Krista chanchin sawi tur hian min thlang ve tlat a ni. Ka sawithiam leh thiam loh chu ka hre lo. Mahse, min chhanchhuaktu, min tifeltu, Pathian nena kan inlaichinna siam thatu chanchin hi chu sawi nuam ka ti a, ka sawi zel bawk ang. Pathian thu ril pui puite han lepse vel hi chu ka thiam ve lo a, ka ngam chiah bawk lo. Amaherawhchu, Missionary leh Evangelist ni lo mah ila,Isua Krista hi ka sual tlanna atan a thi a, a tho leh a, vanramah min lo nghak reng a ni tih hi chu ka hrechiang a ni. Ka thlarau hian nuam a ti thlawt a ni, mi chhandamtu chanchin hril hi. Ka damchhung hian ka ka hian sawi bang lo se. Lawm takin keimah atang hian chhuak thin se tih hi Lalpa min beisei leh min koh chhan a ni ve tlat a ni. Marka 16:15 “Khawvel zawng zawngah kal ula, thil siam zawng zawng hnenah chuan Chanchin Tha hril rawh u.”
3. Krista mi man chhan dang leh chu KA LO MAMAWH EM A NI: Pathian hian min hrechiang khawp hian ka hria. Eng ang mihring nge ka nih tih hi kei ai hian min hre chiang tlat mai a. Pathian tel lo chuan ka taksa, ka rilru te, he khawvel hrim hrimah (competitive world) ah pawh hian ka ding chhuak zo dawn lo ka mamawh a ni tih hi a lo hre khiau mai,Johana 15:16 “Nangnin mi thlang lo, keiman ka thlang zawk che u a,”
4. Pathian hmangaihna la na mi tak a ni: He thu mak tak a ni. Ka ngaihtuah thin a Pathian hian min chhandam avang hian hlawkna vak a nei lo. Nimahsela, Pathian hian amah kawm turte, ka bula awm te hi zuk duh ve tlat a ni. Vanrama engkim nei thei, an chawimawi hut hut kha thi turin min hmangaih avang liau liauin a rawn kal tlat mai a ni. Hei hi Pathianin mi man chhan chu a ni tlat mai, min hmangaih tlat. Setanan a duh duh a min bum a, keimah leh keimah sual hmanga ka in ti na thin te hi min hmangaih vangin a hmu thei tlat lo. Min chhanchhuahnan tuar pawh a huam tlat a ni. He khawvel a ka awm chhung ngei pawh hian ni tin sual laka hian min chhandam a duh, ka bula hun chan, hun hman dun te hi a duh tlat. Tin, Pathian thikthu chhe tak a ni bawk. I Korinth 3:16 “Pathian temple in nih leh Pathian thlarau nangmahniah a cheng tih in hre lo vem ni”
I Korinth 1: 30 Nangni erawh chu ama zarah Krista Isuaah chuan in awm a ni; ani chu Pathian hnen ata kan tan finnaah siam a ni, felnaah te, thianghlimnaah te, tlannaah te nen”