TUNGE I NIH?

Zofate ngaihdan tlang atang chuan rawngbawl tih hi kan huam zim tir em em a, rawngbawl kan tih hian pastor, evangelist, missionary etc. te hi kan kawh tir deuh ber thin. Mahse Bible hi ngunthluk zawkin han chhiar zel ila, rawngbawl tih hi zau tak a lo ni. Kan rawngbawl dan erawh a inang lo mai chauh a ni a, ringtu mi piangthar tawh phawt chu rawngbawl kan ni.
Chu ngaihdan avang chuan pastor, evangelist, missionary ni ve loten rawngbawlah kan inngai lo va, ringtu mi piangthar inti siin mahni duh danin kan awm leh chawk thin. Mi piangthar tawh phawt chu rawngbawl kan nih theihna chhan chu tih danglam kan nih tawh vang a ni. Kan tih thin thil tha lote kalsan kan nei ang a, thil tha kan la tih ngaih loh kan ti tan bawk tur a ni. Chu tak chu kan rawngbawlna chu a lo ni zawk a, heng pastor, evangelist, missionary-te chauh hi rawngbawl an ni lo tih hi i hre thar leh theuh ang u.
Mi piangthar ka nih tawh vangin rawngbawltu chu ka ni a, miten min thlirin min chhiar reng thin. Kan nunah ei tur an zawng thin a, ei tur thlum tak nge i pek thin a, kha tak ? Miten kan nunah hian hmuh chak an nei thin a, mite tibeidawngtu nge i nih, mite beiseina thar pe thintu zawk? Nangmah mai chuan mite engmah pek tur i nei lo tih chu a chiang reng mai, mahse nangmah kaltlang khan Lalpan mite hnenah thu a sawi duh a, chu chu i lo hnawlin i pawm thei a ni. II Korin 5:20-ah chuan, “Chutichuan, Krista aia palai kan ni a, Pathianin keimahni min hmangin a ngen chiam che u tih theih a ni; “Pathian nen lo inrem rawh u,” tiin Krista aiah kan ngen che u a ni.” Hetah hian Krista aia palai kan nih thu chiang takin min hrilh a ni.
Palai tih awmzia chu tirtu a awm a ngai a, a tirh a awm a ngai bawk a, a dawngsawngtute an awm a ngai bawk thin. Heng pathumte-ah hian palai hna chu “tirh” tih hian a thawk dawn a ni. Min tirtu chu Pathian a ni a, tute hnenah nge min tirh? Kan veng kan chhehvel ringlotute leh ringtu tlusawp mekte hnenah a ni. Chuvangin keini hi Pathian mitirh kan ni a, Pathian palaite kan ni. Palai hna ropui leh hahthlak zawng zawng lo thawk zo hmasa bertu chu Pathian fapa mal neih chhun Lal ISua Krista ngei kha a ni. Kan thawh tur zawng zawng kan tih theih loh zawng zawng nen, min thawh sak vek tawh a, ama chakna rinchhana a aiawha palai hna thawk turin nang leh kei hi he khawvelah hian min lo din a lo ni. Palai tih awmzia chu kan fiah viau tawhin a rinawm.
He ringtu nun kawng chhukchho kan zawh mekah hian pawimawh em em mai chu mahni inhriat chian leh miten engtinge min hmuh tih hriat a ni. Chu chu Lal Isua ngei pawh khan a lo ngaipawimawh hle a, a zirtirte hnenah a zawt nghe nghe a ni kha. Marka 8:27, “Tin, Isua leh a zirtirte chu an kal chhuak a, Philipa Kaisari khawperahte chuan an kal a; tin, kal pahin a zirtirte hnenah, “Miten tunge a ni mi tih?” tiin a zawt a.” He zawhna hi ringtute tan a pawimawh em em a, midangte hriat kan tum luat vang hian mi tam takte chu kan buai fo thin. Mite chanchin kan hriat ang hi a lo ni chiah thin lo va, kan rindan/ngaihdan tlem belhchhahin mite nunah kan teh fo thin hi thil pawi tak a lo ni. A zirtirte kha Isuan a zawh lai khan, Petera chiahin a chhang dik a, mahse chu pawh Pathian hriattir a nih thu Isuan a sawi. Marka 8:28, “Tin, anni chuan, ” ‘Baptistu Johana a ni,’ an ti chia; mi dangin ‘Elija a ni, an ti chia; thenkhat erawh chuan, ‘Zawlnei tua emaw a ni,’ an ti che,” tiin an hrilh a. 8:29, “Tin, ani chuan an hnenah, “A nih leh nangnin tunge a ni mi tih?” tiin a zawt a, Petera chuan a hnenah “Krista chu i ni,” tiin a chhang a.”
Mahni inhre chiang mi chuan mite a tawng apuiin an va dem ngai lo, sualna nei lo chuan deng hmasa rawh se tih ang khan. Mahni kan inenlet loh chuan mahni fing em em a inngaiin mite mawl em emah a dah theih tlat a ni. Chuvangin, mahni in hrechiang phawt ila, chu mi hnuah Lalpa rawngbawl hna, nitina kan nundan hi mite tan a lo mawi dawn a lo ni.