MOSIA LEH A PUZAWN JETHROA
Upa R. Lalrosanga
Israel fate Aigupta ram atanga hruai chhuaktu Mosia kha Amrama leh Jokebedi fapa naupang ber a ni a. An unau hi pathum an ni a, Miriami a upa ber a, Arona’n a dawt a, Mosia hi a naupang ber a ni. An upat dan indawt chiaha ziakna hi Bible ah lang lo mahse, a upa ber chu Miriami niin a lang, a chhan chu Mosia nausen lai (thla thum mi a nih) khan a awmtu a ni (Ex 2:2,4). Tin, Mosia thih khan kum 120 a upa a ni a Duet 34:7), Arona kha kum 123 a ni Numbers 33:39). Mosia hi Arona aia a dam rei zawk avangin Arona kha Mosia aiin kum 3 chuangin a upa a ni. Mosia kha kum 40 anih hnu-ah a tlanbo ta kha a ni a (T.T 7:23), chumi hnu kum 40-ah Mosia chu kum 80 a lo tlin khan Sinai tlang thlalera beram rual a ven laiin Pathianin Aigupta ram atanga A mite hruai chhuak turin a tir ta anih kha (T.T 7: 30). Tichuan Mosia chu kum 40 chhung Pharao-a fanu-in a fa atan la in a enkawl ta a, kum 40 a tlinin Midian ramah a tlanbo va, kum 80 mi anihin Pathianin Aigupta ramah a tir a, kum 120 mi anihin a thi ta a ni.
Mosia tlanbo ta kha Midian ramah a kal ta a, Reuela fanu Zippori nupuiah a nei ta a. (Ex 2:18, 21). Reuela hming dang chu Jethroa a ni (Ex 3:1). Jethroa kha Midian puithiam a ni a, (Ex 3:1). Midian ho hi Abrahama’n a nupui hnuhnung Keturi laka a fapa palina thlahte an ni (Gen 25:1,2). Bible zirmite sawi danin Midian ho hian atir lam chuan Jehova hi be ve bawk mahse, hun lokal zelah pathian chi hrang hrang – Baal te, van pathiannu te, Asteroti te an be thin niin an sawi a. Chuvangin Pathian nung ni lo, milem be tute an ni. Mosia chu makpa chhung khung niin milem be chhungkua, chutah pawh an puithiam ngei inah kum 40 lai a cheng tih a hriat theih a. Kha tia Mosia, Pathian nung Jehova betu, Aigupta finna zawng zawng zir chhuak (T.T 7:22) khan inngaihtlawmna, rinawmna leh Pathian a rina, a tih tlatna nun khan lemchanna nun tel miah lo khan a puzawn te chhungkua kha a lo hmin hman hle a nih a rinawm hle mai, Aigupta rama a kal dawn khan a pu Jethroa chu a dil hmasa a, Jethroa phalna thlapin Pathianin Aigupta ramah a kal tir a (Ex 4:18,19), Mosia chuan a nupui fanau te hruaiin Pathian tiang kengin Aigupta ram chu a pan ta a ni. (Ex 4:20) Mosia nupui Zippori hi a pa Jethroa hnenah a fapate pahnih hruaiin a kir leh niin a lang a, a chhan chu thlalera Mosia leh Israelte Pathian tlanga an riah hmuna an awm laiin Jethroa chuan Zippori leh a fapa Gersoma leh Eliezara te hruaiin Mosia chu an rawn fin ve a ni (Ex 18:2,5). Mosia chuan a puzawn Jethroa hnenah chuan Pathian hnathawh ropui tak tak amah leh Israel fate’n an hmuh chu a lo hrilh a. Chutah chuan Midian puithiam Jethroa chuan Pathian nung Jehova chu a lo ring ve ta a ni.(Ex 18:8-12)
Heng atang hian kan in enfiahna tur a awm ta. Mizoram hi UT kan nih atangin kum 49 zet a liam tawh a. Mosia’n a puzawn Jethroa a hrawn chhung kum 40 aia rei fe chu milem bia kan tih thin te hi kawng hrang hrangah kan dawr nasa a. Heng hun chhung zawng hian sorkar hmalakna te, kan in sumdawn tawnna kawngah te, zirna kawngah te, sorkar leh company-a hna kan thawhnaah te, infiamna kawngah te, hotel-a kan thlen thinna leh Missionary tir a hnam dang milem bia kan tih te nen kan in dawrnaah te hian Pathian ringtu kan nihna hi eng angin nge kan lan chhuah tir le? Jethroa’n, “ Tunah chuan LALPA chu pathian dang zawng zawngte ai chuan a ropui zawk a ni tih ka hre ta..” (Ex 18:11a) a tih ang hian kan nunah hian vai ho hian Pathian nung bia kan nihna thil danglam hmuh tur an nei em le? Hei hi a zau lutuk kan ti anih pawhin kan khawtlangah Pathian hre lo kan kan unaute ngei kan tih, sual kawng zawh leh ruihhlo ngai, zungawl vei, tia kan hmuh te hian Pathian nung be tu kan nih hi an hmu ang em le? Tun hma deuh va ZEF zaipawlte, zaia rawngbawl tura USA-a an kal khan tum khat chu an inkhawmnaah an Biak In chhuah dawna hmuh theih ngei turin sign board pakhat an lo tar a, chuta an ziak chu, “I Mission Field chu heta tang hian a in tan chiah e,” tih a ni. Biak In pawnah, kohhran programme piaha kan nun tak hi a ni, mi te’n an chhiar a, min tehna chu. Pathian hnenah ngaihdam dil a, kan nitin nuna ataka Pathian thutak kan nun chhuah pui theih nan kan za atan Lalpa’n malsawm rawh se.