DUHTHLANNA RUAM (Joela 3:2)
Hringnun hi duhthlanna a ni e kan ti thei awm e. Duhthlanna chuan keimahni, kan hun, tha leh zung leh kan taksa chenin a nghawng tel vek mai a ni. Keimahni mai ni lo in kan bula mite thlengin a kangkai ve vek thin a ni (Social Animal kan nih vang pawh a ni awm e.) Kan duhthlanna rah chhuah kan hmu nghal vat emaw nghahrei ngai deuh chi pawh ni se.
Pathian chuan tungchho a kal, mihring tawh phawt mai chu duhthlanna hi min pe vek mai a ni. Pathian rawng nge kan bawl dawn? Nunna nge thihna kan thlan dawn tih thlengin thu kan lo nei ve ta a ni. Deut 30:19 ah chiang takin kan hmu, chang 20 na ah chuan Pathian hmangaiha, a thuzawm lawmman te kan lo hmu ta a ni. Pathian hian chiang taka min hrilh chu Mihring fate tih hrehawm hi a duhzawng leh a lawmna a ni lo. Hremhmun kan tla duh lo a, sima kan hawikir duh anih chuan ngaihdamna nena min kuangkuah hi a la duh reng a ni.
Helai thu atanga chiang taka kan hmuh chu, ram emaw, khawtlang emaw pawh Pathian hnawla, ama thu zawm duh lote hnenah vaukhanna (warning) a pe a ni tih kan hriat a tul awm e. Israel-te hnenah khan ro ka rel sak dawn che u. Chuvangin, sim ula, ka lam rawn hawi rawh u a tihna a ni tel bawk a ni.
“A NIH CHUAN NITIN HI PATHIAN IN CHANCE MIN PEK CHU A NI”
Isaia 1:23. Lalpa chuan, “Hawh teh u, i ngaihtuah tlang teh ang u! In sualte chu sen lar angin awm tawh mah sela, vur angin a var ang; senduk angin sen tawh mah sela, beram hmul angin a awm ang.”
Pathian hian eng ang a sual buru emaw turu emaw pawh lo ni ila, a bet zawng zawngte hian a tlengfai var thei a ni. Duhthlanna thlang sual tawh Israel fapa te Pathian sawiloh dan ang zela awm tawh ho pawh, sim ula lokir rawh u ti a au duhtu chuan, Rorelna lo thleng tur laka an him theihna tur in sim a, a ngaihdamna chang turin a au lawm lawm a nih kha.
Thufingte 1:24 ah chuan, “Ka ko che u a, in duh lo va, Ka kut ka phar a, tuman in ngaisang lo va;” tih a in ziak a ni. Pathian hian a mite bo tawh hnu hi kohkir a va han tum nasa tak em. Hmanlai mite hi kan lo thiam lo ve ngawt ang tih a hlauhawm khawp mai. Keini phei chu Pathianni chhun leh zan, Nilaini, Inrinni, Crusade, Camping etc. hmang hian min ko nasa tih hi kan hriat ve a ngai a ni. Pathian ngaihtuah peih miah loh leh Pathian ngaihsak duh miah lohna hi Setana hmanraw pawimawh tak pakhat a ni ve bawk a ni.
Ezekiela 18:31 “In bawhchhiatna zawng zawng, in lo bawh chhiat tawhte chu paih bo vek ula, thinlung thar leh rilru thar insiam rawh u: Engah nge in thih ang le, aw Israel chhungte u? Pathian hian engtin nge kan sawi ang, a zuk bengharh ti ila a sual kher awm lo e. Pathian chuan harh ula, Jehosaphat ruam ah lokal ula, i ngaihtuah tlang teh ang u a ti a ni. Pathian rorelna hi a dik a, a fel vel vek a ni. Keini Pathian thiltih leh rorelna engmah pawh hre lo tan hian Pathian rorelna lo sawi ve vak vak pawh hi a finthlak vak loh mai thei a ni. Thuthlunghlui Israel fate thiam kan chantir te a nih ngawt loh chuan.
Keini pawh he duhthlanna ruamah hian kan ding ve mek a ni. He khawvel miten an tih ang zawng zawng, tisa thiltih nen hian Pathian rawng kan bawl thei lo a ni. Chuvangin milem biak leh, tisa thiltih te chu kan nun atanga kan paih chhuah a, kan tlanchhiatsan a ngai a ni. Kristiana vanram kawngzawha Kristian’an “Nunna Nunna” ti a au chunga a tlanchhuahsan ang khan. He milem biakna, khawvel leh tisa thiltihte hi, nunna kan chan theihnan, Krista rinchhanin kan tlanchhuahsan ve hi Thalaite’n tihtur kan neih hmasak ber a ni awm e. Kan sualnaten min umphak a, kan khawlohnaten min nanchin hma ngei hian simin a lam i hawi thar leh ang u.