News

BCM Hi
Kan Kohhran, Baptist Church of Mizoram chanchin tlangpui, Assembly vawi 119-na BCM Biak In Farm Venga neih meka General Secretary report atangin lo en ila:

Kum kalta (2014) chhunga kan Kohhran dinhmun thenkhat tarlang leh ta ila:-

Report-a a lan dan hian BCM hian Pathian hruainain hmalam a pan zel a, hmasawn takin kan la kal zel tih a lang chiang a. Kan thlen chinah erawh chuan hmasawn zel tur kan ni a, Kohhranin hma a sawn nan hian Kohhran mi tin, te ber atanga lian ber thlengin tisa leh Thlarau Nunah hma kan sawn a, tan kan lak zel a pawimawh em em a ni.

Missionary Thlen Champha 8th March 2015
Vawiin Pathianni, 8th March 2015 hi BCM Calendar-a Ni Pawimawh te zingah langin he ni hi ‘Missionary Thlen Champha’ tia vuah a ni a. Sap Upa leh Pu Buanga te Baptist Missionary Society (BMS) London te tirha Zorama an rawn kal a, Tlabung an rawn thlen, Mizoram leilung an rawn rah ni champha a ni.
Mizorama Chanchin Tha hril tura lokal hmasa ber, Sap Upa (Rev FW Savidge) leh Pu Buanga (Rev JH Lorrain) te hi Zorama Chanchin Tha hril turin Dt 11th January 1894 khan Zoram an lo lut tawh a, rawngbawl hna tam tak an thawk hman tihin 1897 khan anmahni rawn tirtu Arthington Mission hian hmundanga insawn turin an ti a. Mahse, Sap Upa leh Pu Buanga te hian Zofate zingah nasa taka la thawh ngaia an hriat si avangin London-ah an haw thla a, Mizoram ngeia hna thawh dan tur kawng an dap a.
BMS London hian an hmathlir te tha tihpuiin Zofate zinga rawngbawl zawm turin anni pahnih hi a lo ruai ta a. Tichuan, BMS tirhin 1903 March Ni 8 khan Zoram an rawn chuangkai leh a, April Thla atangin Serkawnah hian inbeng belin Zofate tan Chanchin Tha puandarh hna nasa takin an thawk chho ta a ni.

BCM Assembly BCM Biak In Farm Venga neih mekah rorel palai 926 an inziak lut a. Dt 5.3.2015 chhun atang khan rorel tluang taka neih a ni a. President kalchhuak tur Rev H Sangchema’n President Elect Rev C Ngurhnema hnenah Rorelna Dawhkan a hlan hnuah Rev C Ngurhnema hian rorel inkhawm hi a kaihruai nghal a. Rorel inkhawm tan tirah hian President Elect tur thlan a ni a. BCM President Elect atan Rev Lalthangliana Hnamte chu thlan chhuah a ni.

Jubilee Bible School (JBS) Serkawna Bible zir tur batch hmasa ber atan mi 32 lak an ni a, heng zinga pariatte hi BCM missionary thawk lai deputation-a lut te an ni a. JBS-a zir tur lak zingah hian kan Unit TKP Executive Committee member ni lai mek Tv R Lalmalsawma a tel ve a. Pathian hruainaa tluang tak leh tha taka a zir kan duhsak a ni. JBS hawnna hi Dt 4.3.2015 zan khan Farm Veng Biak Inah Assembly tan zanah neih nghal a ni a. April Ni 7, 2015 hian class an tan dawn a ni.

Dt 2.3.2015 zan inkhawm banahkhan unit sumtuak nana semchhuah tur Piggy Bank siam hnatlang member ten an thawk a, Piggy Bank te hi colony hrang hrang hruaitute hnenah semchhuah nghal a ni a. Remchang hmasa berah colony hruaitute’n member awmna in tinah an rawn sem darh ang a, Dt 29.3.2015 (Pathianni) ah lakkhawm leh tura ruahman a ni.

Kan unit TKP-in Missionary chawm nana Missionary Support (Faith Promise) Envelope kan pek chhuah kha, rinnaa pe tura intiama lachhuaktute’n vawiin hian kan unit hruaitute hnenah thehluh theih a ni a, March Thla atana kan Faith promise lakkhawm hi zanin inkhawm banah hian chhiar tur a ni. Faith Promise envelope hi la ve duh, la la remchang lo kan awm a nih pawhin April Thla atanga pe tan tur pawhin lakchhuah theih reng a ni a, a duh tan kan unit Secretary leh Assistant Secretary te hnenah ngaihven theih a ni.

Chapman Colony TKP te chuan tunlaiin colony sumtuak nan Pu Chhunkunga Ralte in ban khur laih hnatlang an thawk a, tunkar chhung khan an laih tur neih ang chu an lai zo a ni. Member an thawkchhuak tha thei hle.