11th,January,2015
Vawiin January 11, 2015 (Pathianni) hi Mizoram-a Missionary hmasa ber lo thlen champha phak, “Missionary Day” a ni a. Kohhran hrang hrang ten awmni khamin inkhawm leh Inpawlhona/zaikhawm-in hun an hmang thin a ni. Mizoram Baptist Kohhran pawhin he Ni hi urhsun takin a hmang thin a. Kuminah pawh Tualchhung Kohhran tinah Programme siamin an hmang leh dawn a ni.
Sap Sipai Officer Thomas Herbert Lewin (Thangliana) chuan 25th December 1871 khan a nupui Dari leh a hote nen Belkhai atanga mel 6 Tuikawi khuaah Krismas hman puiin ngaihnawm takin Lal Isua pian thu hi a lo sawi tawh a, (Lalhluna, RK; Rothangpuia, Thangliana & Darhmelthai, Tlabung Centenery Souvenir). Mizorama Chanchin Tha rawn thlentu hmasa ber a ni thei hial awm e.
Hemi hnu kum 20-ah 1891-ah The Welsh Calvinistic Methodist Foreign Mission hnuaia Khasi and Jaintia Hills hnuaia thawk lai Rev. William Williams chuan Mizoram a rawn tlawh ve a. Mizote chanchin a lo hriat thawi tawh avangin missionary intirh nan a tha dawn awm em? tih enthlithlai tura lo kal a ni. Thla khat chauh Mizorama awm phalna pek a ni. March 14, 1891-ah a lo kalpuite nen Mualvum khaw bul Kutbul lui chhuah an lo thleng a, March 15, 1891 hi Pathianni a ni a, Kutbul lui chhuah bulah hian an cham. Chawhnu thlang herah Mualvum khaw mipa naupang 10 vel hnenah Bible milem an kente an pe a, hlate pawh an sa a ni awm e. (Lianzual P.L.; Zofate Chanchin Tha Rawn Hlantute 2012).
January 11, 1894 khan kan rama Missionary hmasa berte Sap Upa leh Pu Buanga-te chuan Sairang, Mizoram an lo thleng a. Heta tanga chhiar tana a kum za-na, Mizoram Gospel Centenery chu Mizoram kohhran lian pahnih Presbyterian leh Baptist-te chuan in lungrual takin Mizoram pum pui huapin 1984 khan an lawm a. Kan pioneer missionary-te lo thlen champha vawi 120-na chu vawin January 11, 2015 hian Pathianin min lo hruai thleng leh ta a ni. He hun pawimawh takah hian Kohhran member zawng zawngte Mizoram Baptist Kohhran Headquarters Office atangin Chibai kan buk a che u. Sap Upa leh Pu Buanga ten Mizo hnam tana an thawh nasat zia leh Mizo hnam tana an hnathawh hlut zia hi hun reilo te chhunga sawi sen pawh a ni lovang.
Isua Krista Chanchin Tha min hrilh a, Chhandamna kawng min kawhhmuh a, Kohhran min dinsak a. A AW B leh lehkha chhiar tur min siam sak bakah zirna sikul min din saka, lehkha min zirtir bawk a. Kan Thlarau leh taksa tihdamna rawngbawl hna thawkin nun dan mawi leh tha te min zirtir a. Kan hnam hmasawnna lungphum phumtute an ni. Ramhuai biakna leh hlauhna lak ata Lal Isua Krista Chanchin Tha-in min chhan chhuak a, chatuana nunna min pe a. Silh leh fen mumal tak pawh la inbel nachang hre lo, saruak deuh thaw kha an rawngbawlna avangin khawvel pumpui huapa inchei dan pangngaiin kan lo inchei ve ta a.
A AW B CH nei lo kha India ram hmar chhak state pariat zingah ziak leh chhiar thiam tamna ber kan lo ni ta reng mai. Maurap in chhe te te-a khawsa thin zofate kha tunah chuan in tha tak tak mawi leh nuam tak takah kan lo khawsa ve ta. Ei leh in tur tuihnai engmah nei ngai lo zofate khan kan missionary te Sap Upa leh Pu Buanga rawngbawlna kal zel avangin ei tur tuihnai leh tha tak tak kan lo eiin kan lo in phak ve ta. Mizo mipuite chhim leh hmar chhak leh thlang ami ten tun dinhmun kan lo thleng ta hi an mahni vang liau liau a ni. Lalpan kan pioneer missionary-te Sap Upa leh Pu Buanga-te hmangin thil ropui tak min tih sak avangin I lawm ang u.
Kan ram sorkar, kohhran leh mipui zawng zawngte hian January 11, Missionary Day hi hlut na chang hria ila, kohhran tin ten Pathian hnena lawmthu sawina inkhawmna hun atan I hmang theuh ang u. He hun ropui leh awmze nei takah hian lam thei lam ila, a lawm nan ruaite hial pawh theh thei chuan theh ila, kan missionary te rawngbawlna avanga Lalpa fak leh chawimawi nan i hmang theuh ang u. Kan ram sorkar-in chhuti ni atan a lo puang hi a lawmawm tak zeta, zofate khawvela kan awm ve chhung chu tihdanglam tawh loh nihial se a va tha dawn em!
He ni ropui takah hian keini anga Chanchin Tha Malsawmna la dawng ve lo tam tak ten malsawmna an lo dawn ve theihna turin I in hlan thar zel ang u. Hlim taka Missionary Day hmang theuh turin Lalpan awmpui che u rawh se.