KUMTHAR THUCHAH
President, STKP 2018

Pathian khawngaihna avangin Kumthar 2018 chu kan lo chuang kai leh ta reng mai. He hun thar min petu Pathian chu fakin awm rawh se. Keini pawh beiseina thar nen kan rilru Lalpa lamah dah ila A duh anga kan nun te hmang thei turin inbuatsaih zel teh ang.
Kum a lo thar hian, mitinte kan rilruin thil engemaw kumthar atan chuan kan nunah danglamna neih ngei kan tum fo thin a ni. Engemaw tak kumthar ah chuan ka ti ang tiin kan inbuatsaih fo thin a ni. A tam zawk hi chu kan taksa tana thil thalo kan lo tih thin te sim/ngheina lam a ni fo thin a, kan nunah thil tha leh vawiin thlenga kan la chhunzawm tak te pawh a awm ngei ang. Heng mihring lam taka kan inbuatsaih pawh hi a tha hle a, kan taksa tan te pawh a tha teh meuh mai. Kan nuna thil tullo leh keimahni ngei pawhin kalsan kan duh te hi chu kalsan zel a, taksa hriselna pawh kan ngaih pawimawh zel hi a tha em em a ni. Taksa hrisel leh thianghlimna hi, Pathian duh zawng anih bakah kan tan pawh a tha em em a, hmasawn zel pawh kan tum tur a ni.
I Timothea 4:8-ah chuan “Taksa insawizawina hi sawt zawng a sawt ve bawk a; Pathian ngaihsakna erawh hi chuanin nunna tuna awm sa leh la awm leh tur pek tiamna a neih avangin kawng tinrengah a sawt a ni.” Tiin min hrilh a. Kum lo thar atan a kan pawnlam inbuatsaih na ah hian kawng hrang hrangin hmasawnna kan nei a ni thei e, mahse chung zawng zawng aia pawimawh zawk chu kan nun hian Pathian ngaihsak na kawng hi a zawh em tih hi a ni, mahni i inenfiah thar ang u. Pawnlam thila kan inbuatsaih mek lai hian a pawimawh zawk Pathian ngaihsakna hi kan lo hlamchhiah si chuan a sawt dawn lo a ni.
He kumthar kan hman chhoh mek ah hian tunge kan mimal nun, kan chhungkua leh khawtlang min kaihruaitu atan kan thlan dawn le? Tunlai khawvel hmasawnna chak tak leh intlansiak mup mupna karah mitin mahni theuh kan buai em em tawh a, chung zingah chuan keini Kohhran mite pawh kan cheng ve mek tho a ni.Heng khawvel thil te hian min lo eiral ve mek em? Nitin a kan nun, kan rilru min kaihruaitu tam ber hi Lal Isua nge, sum leh pai tih te leh eizawnna kawnga midang phakloh kan hlauhna ringawt ngaihtuah in mahni chhungkua pawh rel fel hmanlo lekin kan hmanhlel em tih te kan in zawh nawn a tul hle mai. Fakna hla ah, ” Aw ringtu tunge hruai thin che? i nunah tunge Lalber le” tih kan hmu a, kan nun hruaitu atan leh Lalber atan Isua kan hman loh chuan kan nun a buai nuai mai thin a ni.
Nu leh Pa te kan nunah, kan rilru ah enge lalber thin le? Mahni chhungkua pawh ngaihsak hman lek lova hmanhlel, fate Pathian lama hruai hmanlo leh kuah khawm hman reng reng lote hian a awm theih awm mange. Hei tak mai hi Setana’n remchangah a lo chuh a kan ro chan Van ram thlenga kan chhawm theih te hi kan inrinloh lai hian kan lo ch├ón mai palh ange, kan harh chhuah meuh chuan duh aiin a lo tlai tawh thin. Chuvangin ka mimal nunah, leh chhungkua leh khawtlang ah hian Lal Isua hi min hruaitu atan leh Lalber atan he kumthar ah hian kan hman a him ber a ni.
Vawiin a kan ram leh khawtlang nun a harsatna tam tak kan tawh mek leh kan hmachhawn mek tam tak hi chu mimal leh chhungkua tam tak ten kan nun hruaitu kan thlan fuh tawk loh vanga thleng tam tak a awm ngei ang. Heng kan harsatna siamtha tur hian Sawrkar emaw Tlawmngai Pawl leh midangte beiseia mawhphurh tir lovin Pathian thu zawk atanga kan inenfiah hi a tul ta hle mai. Sual dona leh beihna kawngah chuan mihringin kan tih theih ang ang chu kan ti nasa hle tawh mai. Amaherawhchu, tha kan thlah rual rualin kan chaklo zawk nghal zel anih hi. A pawimawh ber zawk Lal Isua hi min hruaitu atan kan thlan hi a tul a ni.
Deuteronomy 11:16-a kan hmuh ang khan Israel fate hnenah Lalpa chuan an hmaah Malsawmna leh anchhia a dah thu te leh, a thu an zawma amah an thlan chuan malsawmna tam taka a vur tur thu leh amah an hawisana, an duh loh chuan anchhia tam tak in a hmuah thu kan hmu a ni. Hetiang tho hian keini pawh kan Pathian, tun hun min hruaithleng tu hian Amah kan thlan a, a duhzawng anga kan nun chuan kan tan malsawmna tam tak min dah sak a, heng malsawmnate dawng tur erawh hi chuan aman tam tak kan pek ve erawh chu a ngai a ni. Lalpa thlangtute leh a duhzawng anga nung thin te leh thlangtu te nun hi a itawm thin hle mai, an mahni ah lawmna tam tak hmuh tur a awm a. Harsatna an hmachhawn hunah pawh an nunah Pathian thil tihtheihna leh hahdamna mak tak mite’n an hmu thin ani. Vawiin a kan ram a sualna hnathawh leh thil thalo tam tak min run mek tu te hi mihring in kan theihna hmangin do ve viau thin mah ila kan tireh zo tak tak theilo a ni. Heng sual hnathawh tam tak hnehna tur bulthut pawimawh ber mai chu mimal, chhungkua anga Lal Isua kan hruaitu atana kan thlan hi a ni. He kumthar lawmawm tak min hruaithlengtu Pathian hnenah hian inhlan thar ila Amah ngei hi ka mimal nun leh chhungkua, khawtlang min hruaitu atan i thlang thar leh ang u.