I KIR LEH ANG U
Pu Lalthanliana Langva
Ezekiela 22 : 30 – 31 “Thinura ram chu ka tihchhiat vek loh nan a bang chim rem tha tur, a chhe laia lo tang tur mi, an zingah ka zawng, ka hmu zo hauh lo. Chuvangin ka thinurna chu an chungah ka leih ang a, ka thinrimna mei chuan a tihlum ang; an thiltih mawh chu an chungah ka nghat dawn a ni”
Ezekiela hi Buzia fapa, zawlnei leh puithiam ni kawp a ni a, Babulon saltang zinga tel ve a ni. A hming awmzia hi ‘Pathianin a tichak’ tihna a ni. Zawlnei ni tura koh a nih lai hian kum 30-a upa a ni a, kum 593 BC vel niin an sawi.
A rawngbawl hun hmasa lam Ezekiela bung 1- 24 hian Pathianin Juda te chunga a rorelna a sawi ber a. Sual demna, vaukhanna leh tha taka awm tura ngenna lam a sawi bawk.
Israel fate Babulon awpna hnuaia awm lai hian an nun kawng a chhuk chho ve hle tih a hriat a. A nun dan leh khawsak danin Pathian a tilawm tawk lo va. Mahse, Pathian hmangaihna chuan nasa takin a umzui renga an insiamthat theihna tur leh A thu an zawm theihna nan zawlneite hmangin Pathianin an hnenah thusawiin a vaukhan reng bawk a ni. Zawlnei Ezekiela hnena a sawi hi kum sang tam liam tawh mahse vawiina Mizo Kristiante tan a pawimawh dan leh a hlutna a nep chuang lo. Kan tan pawh harhchhuahna tur leh inenlet vawng vawngna tura thu pawimawh a ni a. Tuna kan ram dinhmun leh tawn mek nen pawh a inmil hle.
Tunlai khawvela kan buaipui ber chu hmasawnna a ni. Hmasawn loh hlau hian ram, khawtlang, chhungkua leh mimal kan intlansiak nasa a. Kan thlenna tura kan beisei erawh kan dinhmun a zirin a danglam vek. Chu hmasawn duhna leh duh tawk reng nei lova kan khawsakna chuan kan nun a tichhe nasa hle a. Hawina lam apiangah thawm tha lovin min chim buai mup mup reng a nih hi. Hmasawn kan duhna chiah hi min siamtu lama tang lova kan hlat phahna a ni a. Sengkhawm lova tidarhtu kan nihna pawh a ni ta a ni.
Tuna kan ram dinhmun kan en chuan harsatna hrang hrang kan neih dan kan hre theuh ang a. A beidawng zawng leh thim zawnga thlirtu tan phei chuan a lungngaihthlak hle. Hawina lam apiangah lungawi lo thawm, natna leh sual vanga rum thawm hriat tur a awm nasa hle.
Kristian ram kan ni a, zaa za kristian inti hial kan ni, mahse kristian ni chunga kan thawm a than mawi loh dan chu mak tak a ni a. Tunah hian India ram pumah AIDS vei pun chak berna state kan ni a. A chhan nia an sawi pawh sex avang a ni. Kristian heti zat awmna leh kan inkhawm nasat dan en hian awihawm lo khawpa rapthlak a ni. Kan inthlahdah zia tilangtu a ni e. Tun anga kan nun chhoh zel chuan kan dam rei dawn lo tih a chiang a. Kan vanglai takin thalai tam takin mual kan liam dawn tih pawh a chiang. Kan huaisen vang ni hauh lovin hnam dangin min hlau ang a. Chakna avanga kan nawr kian ni lovin min kiansan dawn tih a chiang reng. Mizo tih leh natna tha lo veitu tih hi miin min hriat dan a ni thuai ang tih a hlauhawm mang e.
Tunhma chuan Mizo tih hi huaisen, rinawm leh tlawmngai tiin a thangmawi em em a. Tunah erawh hnam ang chuan kan ni tawh kher lo mai thei. Kan rinawmna te hi fet taka teh dawn chuan a nghing nasa a ni. Hma kan sawn tur anga kan hmasawn theih loh chhan te hi kan rinawm loh vang a ni a. Ram anga hma kan sawn dan pawh a lungawithlak loh hle, rinawm taka thawktu kan tlem tihna a ni. Mahni mihringpuite tana rinawm lo hian, Engtin nge Pathian tan mi rinawm kan nih theih ang?
A tana rinawm, rintlak a zawng mêk a. Sualna tipunga hawisantu kan nih reng hi min din chhan a ni lo. A thinrimna leh thununna a lo thlen hma ngeia A lam kan hawi a ngai a. Chhel taka hnungzuitu kan nih a ngai a ni. Chuti ang mi chu Lalpan a zawng mek a ni. I kir leh ang u. Lalpan a thu malsawm rawh se. Amen.